யாழ். கல்வி வலயத்தில் 67.7 சதவீதமான மாணவர்கள் சித்தி - யாழ் வலயக் கல்விப் பணிப்பாளர்

கடந்த வருடம் நடைபெற்ற கல்விப் பொதுத் தராதர சாதாரண தரப்பரீட்சையில் யாழ். கல்வி வலயத்தில் 67.7 சதவீதமான மாணவர்கள் சித்தியினை பெற்றுள்ளனர் என யாழ். வலயக் கல்விப் பணிப்பாளர் உதயகுமார் தெரிவித்துள்ளார்.

யாழ்.வேம்படி மகளீர் உயர்தரப் பாடசாலையில் நேற்று நடைபெற்ற யாழ் கல்வி வலயப் பாடசாலை மாணவர்களை கௌரவிக்கும் நிகழ்வில் கலந்துகொண்டு உரையாற்றும் போது இவ்வாறு தெரிவித்தார்.

கடந்த ஆண்டு நடைபெற்ற கல்விப் பொதுத்; தராதர சாதாரண பரீட்சையில் எமது வலயத்தில் 67.7 சதவீத மாணவர்கள் சித்தியெய்தினர் என்று குறிப்பிட்ட யாழ். வலயக் கல்விப் பணிப்பாளர் உதயகுமார் இவர்களில் 59 மாணவர்கள் 9 ஏ சித்தியினைப் பெற்றதுடன் 57 மாணவர்கள் 8 ஏ, பி சித்தியினையும் பெற்றுள்ளதாகவும் குறிப்பிட்டார்.

மேலும் மிகப்பெரிய எண்ணிக்கையான மாணவர்கள் சித்தி எய்தமையினால் யாழ் கல்வி வலயம் முன்னணியில் உள்ளதுடன் எமக்கு பெருமையும் தேடித்தந்துள்ளனர் என்றும் குறிப்பிட்ட யாழ்.வலயக் கல்விப் பணிப்பாளர் வேம்படி மகளீர் உயர்தரப் பாடசாலையானது தேசிய ரீதியில் 10 ஆவது இடத்தினைப் பெற்றுள்ளதுடன் தமிழ் மொழி மூல பாடசாலைகளில் முதலாவது இடத்தினையும் பெற்று சாதனை படைத்துள்ளது எனக் குறிப்பிட்டார்.

அதேபோல கடந்த வருடம் இடம்பெற்ற கல்விப் பொதுத் தராதர உயர்தரப் பரீட்சையிலே 68 மாணவர்கள் 3 ஏ சித்தியினைப் பெற்றிருப்பதுடன் முதல் 4 இடங்களையும் யாழ் கல்வி வலயமே பெற்றுள்ளது என்றும், ஒவ்வொரு பாடசாலை அதிபர், ஆசிரியர்கள் முன்னெடுத்த செயற்பாட்டினால் இந்த வெற்றியைப் பெற முடிந்தது என தெரிவித்தார்.

நேற்று வேம்படி மகளீர் கல்லூரியின் பிரதான மண்டபத்தில் பிற்பகல் 3.00 மணிக்கு நடைபெற்ற மாணவர்கள் கௌரவிப்பு நிகழ்வில் யாழ்ப்பாண கல்வி வலயத்தை சேர்ந்த பாடசாலைகளில் கடந்த வருடம் ஐந்தாம் ஆண்டு புலமைப்பரிசில் பரீட்சையில் சித்தியெய்திய மாணவர்கள், கல்விப் பொதுத் தராதர சாதாரண தர பரீட்சையில் 9 ஏ சித்தி பெற்றவர்கள், கல்விப் பொதுத் தராதர உயர்தர பரீட்சையில் 3 ஏ பெற்ற மாணவர்கள் மற்றும் அதிக புள்ளிகளைப் பெற்ற பாடசாலை ஆசிரியர்கள், அதிபர்கள் ஆகியோருக்கும் விருதுகள் வழங்கி கௌரவிக்கப்பட்டது.

நேற்றைய நிகழ்வில் கடந்த வருடம் புலமைப்பரிசில் பரீட்சையில் 193 புள்ளிகளைப் பெற்றுக்கொண்ட பி.அபிராம், 191 புள்ளிகளைக் பெற்றுக்கொண்ட அச்சவேலி சென். திரேஸ் பெண்கள் வித்தியாலய மாணவி எல்.வைஸ்ணவி, மற்றும் யாழ் இந்து ஆரம்பப் பாடசாலையைச் சேர்ந்த கே.கீர்த்திகன் ஆகியோர் கௌரவிக்கப்பட்டனர்.

கல்விப் பொதுத் தராதர பத்திர உயர்தரத்தில் 3 ஏ சித்திகளைப் பெற்றுக்கொண்ட 69 மாணவர்களும், கல்விப் பொதுத் தாரதர சாதாரண தரத்தில் 9 ஏ சித்திகளைப் பெற்றுக்கொண்ட 53 மாணவர்களுக்கும், 8 ஏ பீ சித்தியினைப் பெற்றுக்கொண்ட 57 பேருக்கும் கௌரவிப்பு நடைபெற்றது.

இவர்களுக்கான விருதுகளை வடமாகாண ஆளுநர் ஜீ.ஏ.சந்திரசிறி வழங்கி வைத்தார். குறித்த கௌரவிப்பு நிகழ்வில் ஆளுநரின் செயலாளர் இளங்கோவன், வடமாகாண கல்விப் பணிப்பாளர் வைரமுத்து செல்வராசா, பிரதிக் கல்விப் பணிப்பாளர் அருணகிரிநாதன், யாழ் வலயக் கல்விப் பணிப்பாளர் உதயகுமார், மாகாண கல்வி திணைக்கள உத்தியோகத்தர்கள், வலையக் கல்விப் பணிமனை உத்தியோகத்தர்கள், யாழ் கல்வி வலய பாடசாலை அதிபர்கள், ஆசிரியர்கள் மாணவர்கள் எனப் பலரும் கலந்துகொண்டனர்.